臺語詩－白水紅圓

門口埕尾，三隻貓仔曝日花。

老猴離世了後，

第七個冬節。

囝兒孫仔四散，

若像珍珠打斷線。

人情一年一年薄、

天氣一工一工寒。

三落老厝闊海海，

餓死老身無人知。

大囝過上海、

無閒開塭飼鰻栽。

二囝閃泰國、

無閒避債咧走路。

屘囝住後山、

無閒桃花咧過渡。

今年冬節氣，

一陣霜一陣雨，

欲來也無先通報。

印傭初來乍到，

話語聽攏無。

比腳畫手，

事事項項靠指導。

欲款赤砂糖，

店仔斷貨買攏無。

姑不而終──

白水浮紅圓，

誠意食水甜。

今年欠周到，

明年還您烏糖蜜膏。

紅圓粒粒黏嚨喉，

三炷香、祈求衆神：

好話加講、歹話減奏。

一請觀音媽、

再請天上聖母、

三請土地公仔婆。

保庇大囝金魚塭仔趖、

保庇二囝債主跋一倒、

保庇屘囝偷花無風波。

天公燈、搖搖倒倒，

笑阮自身難保厚操勞。

東北季風冷颼颼，

往事如涌一波波，

涌啊涌，涌入夢中河。

頭更眩眩二更劃，

三更夢醒半撐倒。

聽講冬節暝長駱駱，

卡長過彼排凍着十二月露水的竹竿。

一粒白白的安眠藥，

毋知硩會過烏烏的暗夜無？

臺音義注：老猴，老嫗對配偶（丈夫）的戲稱。第七（e）：第七個。老身：老嫗的自稱。囝（kiann2）兒：兒子。屘（van）囝：幺兒。欲（ve）：要或想之意。姑不而終：姑且，不得已之意。食（tsia4）水：喝水。塭仔趖（so）：魚羣在塭內游來游去。眩眩（hin）：形容頭暈眼花。劃（ko5）：形容心中有事，如湖水划動。長駱駱（lo4）：長夜漫漫。毋（m4）知硩（teh4）會過：不知能否壓得住。